Pagapasakaan na sang kaso subong nga semana ang isa ka lalaki nga nadakpan matapos makuhaan sang illegal nga armas-luthang kag droga sa Barangay Intampilan, Panitan, Capiz.
Ang nadakpan amo si alyas “Edwin” isa ka trisikol driver kag residente sang nasambit nga lugar.
Sa interview sang Bombo Radyo kay Police Captain Ronald Ton-ogan, Officer-in-charge sang Panitan Municipal Police Station, iya ginpahayag nga madugay na nga ginareklamo sa ila nga barangay ang amo nga subject person bangud man sa mga salakyan kon gab-i nga nagaguwa kag sulod sa ila nga lugar.
Narekober naman sa puluy-an sang subject person ang 6 ka sachets sang ginapatihan iligal nga droga, isa ka unit sang caliber.38 nga wala sang serial number, kag apat ka mga bala.
Sa subong, nagapabilin ang suspek sa kustodiya sang Panitan Municipal Police Station kag magapangatubang sa Kaso nga paglapas sa Republic Act 10591 ukon Comprehensive Firearms and Ammunition Regulation Act kag Republic Act 9165 ukon ang Comprehensive Dangerous Drugs Act of 2002.
Padayon naman ang kampanya sang mga kapulisan agud mamintinar ang kalinong kag katawhay sa palibot sa banwa sang Panitan.
