Padayon nga ginabulong sa ospital ang 19-anyos nga lalaki nga ginasiling ginkastigo matapos madakpan nga nagapanglingling sa ila nga tupad balay nga may asawa sa Barangay Punta Cogon, Roxas.
Sa exclusive interview sang Bombo Radyo Roxas kay Mr. Joel Agana, asawa sang ginlingling ni Elcris Agupitan alyas Boyet natabo ang pagpanglingling sang suspek sa hulot nila nga mag-asawa sa diin bag-o lamang nakapaligo ang iya misis.
Suno diri nga nakibot ini sang may makita nga ulo sang tawo sa ila nga binate kag sang iya nga buksamn ang kurtina, hinali ini nga nadula.
Nadakpan lamang si Agupitan bangud pagkaligad sang pila ka minuto liwat ini nga nagpanglingling apang nadakpan ni Agana sa diin nagface to face sila sa jalousy window.
Sa kakibot sini, gilayon ini nga nagdalagan pabalik sa ila balay kadungan ang pagsarado sang ila nga pirtahan.
Sa kaakig naman sang mister sa paglingling sa iya nga misis ginsinggitan sini ang kaingud balay nga gilayon man nga nagguwa sa ila balay kaupod na ang utod kag nagdiretso sa balay ni Agana.
Nakaangkon sang kumprontasyon ang magtimbang nga bahin tobtob ginhampak ni Agana sang tubo ang kamot ni Agupitan bangud tuyo nga unahan siya sang sakiton.
Bangud sa hitabo, nag-angkon sang madamo nga pilas si Elcris kag ang utod nga si
Cristituto Agupitan Jr., nga ginpulihan kastigo sang iban nga nagresponde nga mga indibidwal.
