Madugay na nga ginamonitor ang iligal nga buluhaton sang lalaki nga nadakpan sa ginkasa nga drug buy-bust operation sa Barangay VI, Roxas City.
Ang subject person amo si alyas Garry, 50-anyos kag residente sang Barangay 2, Roxas City.
Sa interview sang Bombo Radyo kay Punong Barangay Joelito Aguil sang Barangay 2, Roxas City, iya ginpahayag nga madugay na nga nagapatigayon sang iligal nga aktibidad ang nasambit nga subject person antes pa man nga madakpan sang mga otoridad.
Suno kay Aguil, isa ka daku nga kaginhawaan ang pagkadakop sa subject person bangud magluwas sa pag-enggage sa iligal nga droga, kilala man ini nga makawat sa lugar.
Nahibaluan nga nakuha sa ginpatigayon nga operasyon ang isa ka .38 caliber revolver nga wala serial number, duha ka bala, duha ka heat-sealed plastic sachet nga may unod nga ginapatihan shabu kag isa ka itom nga sling bag.
Sa subong, preso na ang nasambit nga indibidwal kag magapangatubang sang kaso nga paglapas sa RA 10591 ukon Comprehensive Firearms and Ammunition Regulation Act, kag RA 9165 ukon Comprehensive Dangerous Drugs Act of 2002.
