Ginaalegar nga nagagamit kag nagaduso sang illegal nga droga ang lalaki nga nadakpan sa ginkasa nga drug buy-bust operation sa Barangay VI, Roxas City.
Ang subject person amo si alyas Garry, 50-anyos kag residente sang Barangay 2, Roxas City.
Sa interview sang Bombo Radyo kay Bombo Radyo kay Police Chief Master Sargeant Ramil Arcangeles, Spokesperson sang Roxas Component City Police Station, iya ginpahayag nga magluwas sa nagapatigayon sang iligal nga aktibidad ang nasambit nga subject person, kilala man ini nga makawat sa lugar.
Dugang pa ni Arcangeles, madugay na nga ginamonitor ang nasambit nga subject person.
Nahibaluan nga nakuha sa ginpatigayon nga operasyon ang 2 ka sachets sang ginapatihan shabu nga may kabug-aton nga 15 grams kag may estimated street drug price nga P102,000, isa ka .38 caliber revolver nga wala serial number, duha ka bala, duha ka heat-sealed plastic sachet nga may unod nga ginapatihan shabu kag isa ka itom nga sling bag.
Sa subong, nagapabilin sa presohan ang nasambit nga subject person kag magapangatubang sang kaso nga paglapas sa RA 10591 ukon Comprehensive Firearms and Ammunition Regulation Act, kag RA 9165 ukon Comprehensive Dangerous Drugs Act of 2002.
