ROXAS CITY – Wala sang malain nga record sa ila Barangay ang lalaki nga nadakpan sa ginkasa nga buy-bust operation sa Barangay Dumulog, Roxas City.
Matandaan nga ginkilala ang nadakpan kay Lito Pactor, yara sa legal nga pang-edaron kag residente sang nasambit nga lugar.
Sa interview sang Bombo Radyo kay Punong Barangay Stephen Medina sang amu nga lugar, ginpahayag sini nga isa ka maayo nga tawo kag daw kaangay nga indi sila magpati nga sarang ini mahimo ni Pactor bangud nagatrabaho ini bilang tricycle driver.
Suno kay Medina, wala ini sang may nahibaluan nga naulamid sa pagbaligyaanay sang mga armas luthang si Pactor apang may pila na ini ka mga report nga kalakip sa mga serye nga pagkinawatay sa ila lugar.
Mahibaluan nga pinaagi sa isa ka pulis nga nagpakuno-kuno poseur buyer nakuha sa posesyon sini ang 1 unit sang homemade twelve-gauge shotgun nagaduag silver kag itom, P500.00 nga buy-bust money, kag 3,000.00 nga boodle money.
Kaso nga paglapas sa R.A. 10591 ukon Comprehensive Firearms and Ammunition Act ang paga-atubangon sang nadakpan.
Sa karun, nagapabilin ini sa kustodiya sang Roxas City PNP para sa nagakaigo nga disposisyon.
