ROXAS CITY – Nahukas ang ngipon sang 57-anyos nga lalaki matapos nga ginsumbag sang 43-anyos nga meat vendor sa Barangay Adlawan, Roxas City.
Ginkilala ang biktima kay Juan Celoso.
Samtang ang nagpanumbag ang ginkilala kay Marven Deloviar, lunsay mga residente sang nasambit nga barangay.
Sandig sa ginpabalhag nga reklamo ni Celoso, mga alas-7:30 kagab-i sang Huwebes sang nagakinadlaw ang mga ini nga nagalantaw sang kaladlawan nga palagwaon sa telebisyon sa sulod sang ila balay, apang nagguwa ini agud mag-ihi kag agud tsekyaron ang ginpa-ihaw-ihaw.
Sa iya pagguwa, ginpahayag sini nga ginsitsitan siya ni Deloviar kag ginpamangkot kun ano ang ginakinadlaw sini, apang ginsabat ini sang tagreklamo nga ang kaladlawan nga nagaguwa sa TV.
Apang hinali nga ginsumbag ini sa baba’ kag nahukas ang iya ngipon.
Dugang pa sini nga ginsegundahan pa ni Deloviar sang tapungol sa iya nawong.
Natigayon lang suno diri nga makadalagan pabalik sa ila balay sang gintambagan ang mga ini sang Stepmother sang suspek.
Ginpakamaayo sini nga i-report sa mga kapulisan ang insidente.
