Patay ang isa ka lalaki matapos makabunggo ang iya ginasakyan nga motorsiklo sa isa ka truck sa Barangay Nasunugan, banwa sang Dao, Capiz.
Ang napatay nga driver sang motorsiklo amo si alyas “Lomer,” legal ang pang-edaron kag residente sang Numancia, Aklan.
Ang driver naman sang truck amo si alyas “Franz,” residente sang Leyte.
Sa interview sang Bombo Radyo kay Police Captain Rey C. Dordas, Officer-in-Charge sang Dao Municipal Police Station, iya ginpahayag nga halin sa banwa sang Cuartero ang motorsiklo kag pakadto kuntani sa banwa sang Sigma sang natabo ang aksidente.
Suno kay Dordas, nahulog ang karga nga bugas sang motorsiklo, nga ginapatihan nga amo ang posible nga rason kun ngaa nadulaan sang kontrol sa manibela ang driver kag nakabunggo sa nakasugata nga truck.
Bangud sang mabaskog nga impact, nag-angkon sang patal nga mga pilas ang driver sang motorsiklo kag gilayon nga gindala sa pinakamalapit nga ospital, apang gindeklarar nga dead on arrival.
Nagpanawagan man ang natungdan sa mga motorista maghalong sa pagbiyahe, ilabi na kon may karga, agud malikawan ang kapareho nga insidente.
