ROXAS CITY – Pilas sa nawala nga kamot kag natuo nga hita ang naangkon sang 23-anyos nga lalaki matapos nga ginluthang sang 44-anyos nga lalaki sa isa ka burger stand sa Barangay Poblacion, Pilar, Capiz.
Natabo ang pagpangluthang, kaina nga alas-12:25 sa kaaganhon, Mayo 7.
Ginkilala ang biktima kay Rich John Bernales, residente sang nasambit nga barangay.
Samtang ang ginatudlo suspek ang ginkilala kay Johnny Alipante Arcega, nga taga Barangay Cayus, sa amu man nga banwa.
Sandig sa inisyal nga imbestigasyon sang mga katapo sang Pilar MPS, nga samtang yara sa isa ka burger stand ang biktima kaupod ang iya abyan, sang hinali nag-abot ang suspek kag nagpatunga ang komprontasyon sa ila.
Gilayon nga nagbunot sang wala matumod nga sahi sang armas-luthang ang suspek kag ginluthang ang biktima.
Natigayon man nga maaresto ang suspek pinaagi sa nagresonde nga mga kapulisan.
Padayon nga ginabulong ang biktima kag ang imbestigasyon sa nasambit nga insidente.//END
