ROXAS CITY – Ginbawian sang kabuhi samtang ginabulong sa ospital ang 32-anyos nga lalaki matapos nga ginapahayag ginbuno sang hubog nga lalaki sa Calanza Street, Poblacion Takas, Cuartero, Capiz.
Ginkilala ang biktima kay Irenel Salvacion alyas “Pato”, residente sang Sitio Gisok, Brgy. Nagba.
Samtang ang ginatudlo suspek ang ginkilala kay Lester Equia Alavaro, 31-anyos, barbero kag residente sang Sitio Talaytay, sa kapareho nga barangay.
Sa inisyal nga imbestigasyon sang mga katapo sang Cuartero MPS, alas-12:30 sa kaaganhon subong nga Miyerkules, sang nagpadulong sa isa ka burger stand ang nasambit nga biktima kaupod si Aron Homballas, sang nag-abot ang hubog nga suspek kag nag-angkon sang mainit nga diskusyon sa duha kag naghangkatay sang tinapungolay.
Naglakat ang suspek apang sa iya pagbalik may ginasukbit na ini nga matalom nga bagay samtang ang biktima ang naggamit sang kawayan sa ila pag-inaway.
Nag-angkon sang pagbuno sa likod ang biktima samtang ginaalegar nagpalagyo ang suspek matapos ang krimen.
Ginpadangat sa Dao District Hospital ang biktima samtang ginahibalo pa sa karon kun ano ang motibo sa nasambit nga insidente.
Sa karon, yara na sa kustodiya sang Cuartero MPS ang nasambit nga suspek matapos ini boluntaryo nga nagsungka sa mga otoridad.
