ROXAS CITY – Naaresto sang mga katapo sang Criminal Investigation and Detections Group (CIDG) Capiz ang isa ka lalaki nga nagapatigayon sang ilegal nga pagpataya sa Barangay Cogon, Roxas City.
Ini ang ginkompirmar ni CIDG-Capiz Officer-In-Charge Police Major Chris Arthemius Devaras sang mainterview sang Bombo Radyo.
Suno kay Devaras, ang nadakpan amo si Marlon Brodeth Lobaton, Sr.
Ginpahayag ni Devaras nga si Lobaton ang nagapatigayon sang ilegal nga pagpataya sang STL-Bookies nga ginatawag nga Pick 3.
Gindugang pa sini nga halos isa ka semana nila nga ginpaidalom sa surveillance ang suspek matapos nga may nagpalab-ot sa ila sang impormasyon natuhoy sa ilegal nga aktibidad sini.
Nahibaluan pa nga masobra isa ka bulan na sa iya ilegal nga aktibidad ang suspek kag may mga kaupdanan pa ini sa probinsiya sang Capiz.
Kalakip sa nakuha sa posesyon ni Lobaton ang mga gambling paraphernalia kag bet money.
Bangud diri natalana nga pasakaan ang suspek sang panumbungon nga paglapas sa Republic Act 9287 ukon pagpatigayon sang Illegal Numbers Game.
