Patay ang isa ka lalaki samtang nagatabok sa dalan matapos mabungguan sang salakyan sa Barangay Tinaytayan, Dumarao, Capiz.
Ang biktima amo si alyas Ton, 40-anyos kag residente sang nasambit nga lugar, samtang ang suspetsado naman amo si alyas Rick.
Sa interview sang Bombo Radyo kay Police Lieutenant Russell G. Husmalaga, Officer in Charge sang Dumarao MPS, iya ginpahayag nga halin sa Roxas ang driver sang salakyan kag padulong kuntani sa Iloilo sang wala sini natalupangdan ang biktima nga nagatabok sa dalan rason nga nabungguan ini.
Bangud sa mabaskog nga impact, nakaagom sang pilas sa lawas kag ulo ang biktima nga gilayon man ini nga ginpadangat sa ospital apang gindeklara ini nga dead on arrival.
Boluntaryo naman nga nagsungka sa kapulisan ang driver sang salakyan nga sa subong nakahunong na ini sa presohan sang Dumarao Municipal Police Station.
Dugang pa niya wala man sang natabo nga hit and run baliskad sa nagaguwa nga estorya, bangud pagkatapos sang insidente nagsungka man ini ang amo nga driver.
Sa subong, yara na ang bangkay sang biktima sa purinarya kag ginahulat nalang ang pamilya kon magapasaka ini sang nagakaigo nga kaso sa nasambit nga driver.
Nagapanawagan man ang natungdan nga maghalong sa dalanon ilabi na gid sa mga motorista kag pedestrians agud malikawan ang pareho sini nga insidente.
