JAMINDAN, CAPIZ – Pagapasakaan sang panumbungon ang suspek nga responsable sa pagluthang-patay sa iya kaugalingon nga pakaisa sa Sitio Malanao, Barangay San Jose, Jamindan, Capiz.
Kaso nga Murder ang pagaatubangon sang suspek nga si Jordiolin Idio matapos ginluthang ang pakaisa nga si Roberto Lauderes, 49 anyos nga nag-angkon sang pilas sa likod.
Matandaan nga samtang nagainom ang biktima kaupod ang iya mga abyan, hinali na lamang nag-abot ang suspek.
Isa sa mga nagainum ang nagpapuli sa suspek nga gilayon naman nga nagsunod.
Apang ginkakibot na lamang sang tanan nga sa pagbalik sang suspek may dala na ini nga isa ka 12 gauge shotgun.
Natabuan nga sa pagbalik ni Idio nakita sini ang nagapangihi nga biktima.
Posible nga nagdumdum ang suspek nga si Lauderes ang nagpapuli sa iya rason nga hinali niya ini nga ginluthang sa likod.
Gilayon nga gindala sa ospital ang biktima apang gindeklara ini nga dead on arrival.
Samtang nagsungka naman sa punong barangay sang Barangay Camburanan, Tapaz ang suspek nga nagturn over sa iya sa istasyon sang pulisya.
