ROXAS CITY, CAPIZ – Arestado ang isa ka lalaki matapos nga nagmaoy kag nakuhaan sang ginaalegar iligal nga droga sa Roxas City Public Plaza alas 10:45 kagab-i, Hulyo 14, 2025.
Ang arestado amo si Carlos Choy Aldecoa y Alvero, 30-anyos, kag residente sang Barangay VII, Roxas City.
Sa impormasyon nga nagikan sa Roxas Component City Police Station, samtang nagapahuway sa plaza si Police Colonel Alexis Manzano y Maduro, nga naka-assign sa Integrity Monitoring and Enforcement Group (IMEG) sang Philippine National Police, ginpalapitan siya sang suspek kag nagpangayo sang ₱6.00. Sa baylo nga hatagan sang kwarta, gintanyagan lamang ni PCOL Manzano si Aldecoa sang masakyan pauli, apang naakig ang suspek kag ginhangkat sang tapungulay ang pulis.
Gilayon man nga nagresponde ang katapo sang Roxas City PNP kag gin-aresto si Aldecoa bangud sa unjust vexation.
Samtang ginapatigayon ang search incidental to lawful arrest, nakuha sa arestado ang lima (5) ka transparent plastic sachets nga may residue sang suspected shabu, isa ka (1) improvised plastic tooter, kag isa ka (1) itom nga pouch.
Magapangatubang ang arestado sa mga kaso nga Unjust Vexation kag paglapas sa Republic Act 9165 ukon Comprehensive Dangerous Drugs Act of 2002.
Sa karon, nagapabilin ang arestado sa kustodiya sang mga otoridad para sa nagakaigo nga disposisyon.
– With a report from Bombo Jessa Mae Siman De Los Santos
