PRESIDENT ROXAS, CAPIZ – Gin-aresto sang mga kapulisan ang isa ka lalaki matapos nga nagmaoy kag nagtuga sang kakugmat sa Barangay Poblacion, President Roxas, Capiz.
Ginkilala ang naaresto nga si Jomarie Binosa, 60 anyos, residente sang Barangay Marita, sang nasambit man nga banwa.
Mahibaluan nga nakabaton sang pagpanawag ang mga kapulisan nga nagatuga sang kinagamo ang suspek sa nasambit nga lugar rason nga ila ini nga ginpadulungan.
Sa pag-abot sang mga kapulisan ila gid nga naabtan ang suspek nga nagamaoy kag nagapangsita sang mga tawo sa lugar.
Sang ginpalapitan sang mga pulis, ginsita pa sang suspek ang mga otoridad kag sang ini ang ginkapkapan, nakuhaan ini sang masobra P17, 000.
Nahibaluan nga ang kwarta sang suspek ang gikan sa mga Taiwanese national nga naghatag sang bulig-pinansiyal sa nasambit nga banwa sa mga residente nga nahalitan sang bagyo nga Ursula.
