ROXAS CITY -Ginsaysay sang isa ka lalaki ang na-eksperyensiyahan nga indi maayo nga pagtratar sa iya sang isa ka empleyado sa Roxas City Hall.
Ginkilala ang tagreklamo kay Mathew John Montojo Arcangeles, isa ka negosyante.
Sa ekslusibo nga interview sang Bombo Radyo kay Mathew John Montojo Arcangeles, tagreklamo, ginpahayag sini nga nagpadulong siya sa City Hall agud kun tani magproseso sang Business permit para sa bag-o nga negosyo nga iya ginatukod.
Apang, wala sini gin-ekspektar ang iya na-eksperyensiyahan nga daw kaangay bastos nga pagtratar sang isa ka empleyado nga na-assign sa Business Permit and Licensing Office (BPLO) nga iya ginpadulungan kag ginpamangkotan kun ano bala ang iya kinahanglan sa pagproseso sang business permit.
Suno kay Arcangeles, nakakatutok sa iya nga cellphone ang amo nga empleyado sang siya ang nagpalapit kag nagpamangkot apang wala ini siya ginsapak kag wala malang siya ginpamangkot kun ano ang iya kinahanglan kag nagpadayon sa pagcellphone.
Ginsulit sini ang iya ginpamangkot kag didto na kag nagsapak ang amo nga empleyado apang ginhatagan lamang siya sang lista sang dokumento nga wala manlang sang instructions sa iya kun ano nga sahi sang dokumento ang iya sini nga igaproseso kag hinali na lamang ini sya nga gintalikdan.
Mahibaluan, nga first time nya ini nga magproseso sang business permit rason nga luyag nya man kun tani nga i-assist siya sang insakto kag suno sa iya pagkahibalo amu ang nagakadapat nga aksyon sang mga empleyado sa amu nga talatapan.
Matapos ini nga ginhatag sa iya, nagbalik ini liwat kag ginklaro kun ano bala nga requirements ang iya igaproseso.
Suno sa iya, ginpamangkot naman sya liwat sang empleyado kung ano nga negosyo ang iya sini nga iparehistro kag nagtuad naman sya liwat didto na kag naghatag na sang instructions ang empleyado.
Suno kay Arcangeles naglain ang iya buot bangud insakto man ang iya pag-approach apang amo sadto ang pagtratar sa iya.
Bangud sa kalain sang buot, ginpost niya ini sa social media apang nag-angkon sang nanari-sari nga komento.
May yara sang nagahaboy sang alegasyon nga may politiko sa likod sini kag luyag nga gub-on ang imahe sang alkalde sang syudad nga si Mayor Ronnie Dadivas.
Hugot naman ini nga ginpanginwala sang tagreklamo bangud iya na batasan nga magprangka kag magcorrect kun sala kag indi siya kumpormi sa imo ginahimo.
Suno pa sa iya, wala ini sang picture ukon videos nga makapamatuod sa iya ginareklamo apang nagapati ini nga pinaagi sa pagreview sang CCTV camera nga napahamtang sa amo nga talatapan makita kag maklaruhan ang amo nga alegasyon.
