ROXAS CITY – Tuman ang paghinulsol sang isa ka lalaki nga yara sa likod sang pagpamahog sa principal sang Panit-an National Highschool, bangud sa nangin epekto sang iya ginsulat nga death threat.
Sa exclusive interview sang Bombo Radyo Roxas kay Mr. Jeffrey Dorde, ginpahayag sini nga nakunsensiya ini sa iya ginhimo gani, gin-ako na lamang sini kay Mr. Ronilo Tu ang iya kasal-anan.
Apang ginklaro ni Dorde nga indi matood ang tinaga nga vigilante nga gingamit sini bangud nagaisahanon lamang ini kag wala sang sin-o man nga nagsolsol sa iya.
Suno pa kay Dorde nga ang patung-patong nga mga problema, kalakip na ang kapigaduhon kag nagdugang pa ang pagsugid sang anak nga ginlawag ang pangalan sang mga estudyante nga wala nakabayad sang P350 nga balayaran sa eskwelahan.
Aminado ini nga pamatyag sini sadto nga panahon nahuy-an ang iya anak gani hinali nga nagsulod sa iya pinsar nga pahugon si Tu.
Apang matapos narealisar ang nahimo nga kasal-anan, gin-ako sini kay Tu ang nahimo nga lasal-anan kag nagpangayo sang patawad.
Nag-apelar man ini sa principal nga kuntani, indi na lamang pagdayunon ang pagpasaka sa iya sang panumbungon.
