ROXAS CITY – Nabuking ang lalaki nga fixer nga nagpangilkil sa isa ka caregiver nga nagpangayo sang financial assistance para sa napatay nga hinablos sa talatapan sang gobernador.
Suno kay Edna Laurino 41-anyos, samtang nagaproseso sila sang dokumento para sa ginapangayo nga dugang nga pinansiyal nga bulig gikan sa gobernador sang probinsiya, nagpalapit sa ila ang nagpakilala nga empleyado sang DILG sa Capiz kag nagtanyag sang bulig para mapadasig ang pagproseso sang ginapangayo nga financial assistance.
Nagsalig ang ginang bangud naka-uniporme ang lalaki nga nagpakilala nga hinablos sang duha ka boardmembers sang Sangguniang Panlalawigan nga si Dexter Magallanes ukon Walter Besa.
Nagpangayo pa sang P250 ang suspek kay Laurino, bangud gamiton sini para sa death certificate sang napatay nga hinablos sang ginang
Nagligad ang pila ka semana kag wala nagtuman sa ila nakasugtan ang suspek rason nga nagdesisyon ang ginang nga magbalik sa kapitolyo-probinsiyal, sa diin nabuyagyag ang pagpanunto ni Dexter Bocala nga una nga nagpakilala nga si Dexter Magallanes/Besa nga ginbayluhan ang pangalan sang claimant sa financial assistance.
Ginkalain pa sang buot sang ginang, bangud gin-abuso sang suspek ang ila kaayo kasubong na lamang sa pag-obliga sa ila nga magpreparar sang native nga manok para may makaon ang mga katapu sang DILG nga magabisita sa hamyang kag nagpangayo sang isa ka tiil sang baboy sang mahibaluan nga nagkatay sang baboy ang pamilya sang ginang para ipakaon sa magatambong sa lubong.
Matapos nakumpirma nga ginpasalig kag gintunto lamang sang suspek, ini ang ila ginpa-blotter sa pulisya.
