BOMBO ROXAS – Arestado sa ginpatigayon nga entrapment operation sang mga kapulisan ang 23 anyos nga lalaki nga responsable sa pagpangawat sang cellphone, cash kag sigarilyo sa Kainan Village, Sitio Lawis, Barangay Baybay, Roxas City alas 2 sang kaagahon sang Enero 16 sini nga tuig.
Matandaan nga nagpabalhag sang reklamo sa Roxas City Police Station ang biktima nga ginkilala kay Joemar Bartolo, 29 anyos kag residente sang Barangay Gabuan sining syudad matapos ginkawatan sang isa ka unit sang cellphone nga nagabalor sang P18,000; cash nga P2,000 kag sigarilyo nga nagabalor sang P1,500 sang suspek nga ginkilala kay Jayson Berano nga residente sang Barangay Malag-it, Pontevedra apang temporaryo nga nagaistar sa Sitio Nipa, Barangay Culasi sining syudad.
Sandig sa ginpatigayon nga imbestigasyon sang mga kapulisan, gintawagan sang biktima ang cellphone sini nga yara sa suspek nga nagresulta sa pagbaton sini sang negosasyon sang biktima nga ibalik ang ginkawat nga cellphone kabaylo sang P2,500 nga cash.
Nadesisyonan sang suspek nga magakitaay sila sang biktima sa isa ka 24/7 convenience store sa Arnaldo Boulevard, Barangay Tanque sining syudad subong nga adlaw, Enero 17 kabangdanan nga naghinyo sang bulig sa mga kapulisan ang biktima nga ipaidalum sa entrapment operation ang suspek.
Madasig nga gin-aresto sang mga kapulisan ang suspek sang tion nga gindahu na sini pabalik ang cellphone sa biktima kag pagdahu man kun tani sang kwarta nga igabaylo sa suspek.
Yara na karon sa kustodiya sang mga kapulisan ang suspek kun sa diin mahimo nga mapasakaan sang kaso nga Theft.
