MAMBUSAO, CAPIZ – Pilas sa ulo ang naagom sang isa ka lalaki matapos naagaw ang pusil sini nga iya gintaya sa isa ka persona sa Barangay Maralag, Mambusao, Capiz.
Ginkilala ang lalaki nga nagpangtaya nga si alyas Nonoy Dako, 38-anyos, samtang ang biktima amu si alyas Toto, 37-anyos nga lunsay mga residente sang nasambit nga lugar.
Sa impormasyon nga nakuha sang Bombo Radyo sa Mambusao Municipal Police Station, nagpadulong sa puluy-an sang biktima ang suspek nga si alyas Nonoy Dako kag yara sa impluwensya sang makahulubog nga ilimnon kun sa diin dala sini ang iya pusil kag ginhangkat si alyas Toto nga magguwa sa iya balay.
Sang nagguwa na ang biktima, gintayaan ini sang suspek sang 12-gauge nga armas-luthang ukon ginatawag nga “Sumpak”.
Madasig nga naagaw sang biktima ang amu nga armas-luthang kag ginlampos sa ulo sang suspek nga madasig naman nga nagpalagyo.
Apang, nahibaluan nalang sang ulihi nga nagpadulong sa ospital ang suspek bangud sa pilas sini nga naagom sa paglampos sang biktima.
Kaso nga Grave Threat kag Violation of RA 10591 kag BP 881 ukon Omnibus Election Code in relation to COMELEC Resolution No. 11067 (COMELEC Gun Ban) ang pagaatubangon sang suspek.
