JAMINDAN, CAPIZ – Yara na sa punerarya ang bangkay sang 56-anyos nga mangunguma matapos nga nahulog sa puno sang star apple sa Barangay Agcagay, Jamindan, Capiz kahapon.
Naigo ang dughan kag nabali ang tul-an sang biktima nga si Antonio Ocate residente sang nasambit nga lugar kasunod sang pagkahulog sini.
Sa pagpakig-angut sang Bombo Radyo Roxas kay Police Staff Sergeant Lou Jacinto Robles, imbestigador sang Jamindan Municipal Police Station, nagaguha sa ila imbestigasyon nga nagsaka sa puno sang star apple ang biktima agud magpangkuha sang bunga nga iya ibaligya.
Apang bangud matapok ang sanga sang star apple, nautod ini nga gintunaan sang pagkahulog ni Ocate.
Nagataas sang 15 ka tapak ang nasambit nga puno sa diin batuhon ang natup-an sang biktima.
Gilayon nagresponde ang response team sang Jamindan kag gindala pa sa rural health unit sang amo nga banwa, apang gindeklara nga dead on arrival sang doktor.
Nahibaluan nga kagab-I antes ang insedente, nag-inum pa ang biktima nga ginapatihan may yara pa sang hang over sang nagsaka sa puno sang star apple.
