ROXAS CITY – Nag-angkon sang patal nga pilas sa natuo nga tiil ang 31-anyos nga lalaki matapos nahulog sa ginasakyan nga angkar-angkar kag aksidente nga nalapakan sang dump truck takna 9:30 sang aga, kahapon nga adlaw, Agosto 4, 2023 sa Sitio Agtalin, Barangay Dulangan, Pilar Capiz.
Ginkilala ang biktima kay John Mark Vallar, residente sang Barangay Carmensita, President Roxas Capiz samtang ang driver sang dump truck ang ginkilala kay Jophyl Garcia.
Sa impormasyon nga nakuha sang Bombo Radyo sa Pilar Municipal Police Station, nagikan sa direksyon sang Estancia Iloilo kag papuli na kuntani ang ginasakyan nga angkar-angkar ni Vallar kun sa diin ginamaneho ini Jerry Fuentes kaupod ang isa pa ka menor de edad.
Apang pag-abot sa kurbadahon aksidente nga nahulog si Vallar sa ginasakyan kag nalapakan sang kasugata nga dump truck ang natuo sini nga tiil.
Madasig nga nagresponde ang rescue team sang Pilar kag ginpadangat sa Bailan District Hospital si Vallar nga sa karon yara na sa istable nga kondisyon.
Samtang, ginhilway na sa kustodiya sang kapulisan si Garcia matapos nagtakup ang reglementary period of detention sini.
