Magapangatubang sang patong-patong nga kaso ang 43-anyos nga lalaki nga nakuhaan sang mga armas, granada kag suspected shabu matapos gin-implementaran sang search warrant sa Sitio Pinanubol, Brgy. Poblacion Norte, Ivisan, Capiz sang damlag lang.
Matandaan nga ginkilala ang arestado kay Fredgil Uguil, nga residente sang nasambit nga lugar.
Nakuha sa posisyon sang suspek ang isa ka unit sang caliber .38 revolver, duha ka caliber .45 pistol, isa ka KG 9mm automatic rifle, isa ka granada, mga magazine kag mga bala.
Dugang pa nga nakuha sa paghinakop ni Uguil amu ang tatlo ka sachet sang suspected shabu, mga sling bag, isa ka awto nga salakyan nga nagaduag pula kag lima ka yunit sang motorsiklo.
Paglapas sa Republic Act No. 10591 ukon Comprehensive Firearms and Ammunition Act, Republic Act 9516 ukon illegal possession of explosives or incendiary device kag Republic Act 9165 ukon Comprehensive Dangerous Drugs Act of 2002 ang mga kaso nga pagaatubangon sang suspek.
Ang search warrant ang gin-isyu kag ginpermahan ni Hon. Lorencito B. Diaz, Acting Executive Judge, RTC, 6th Judicial Region, Branch 17 Roxas City, Capiz nga napetsahan sadtong Octobre 9, 2024.
Sa karon, nagapabilin ang nasambit nga arestado sa karsel sang Ivisan Municipal Police Station para sa nagakaigo nga disposisyon.
