ROXAS CITY – Padayon nga ginatumod sang mga kapulisan ang identity sang isa ka lalaki nga nasapwan patay sa Barangay Dolores, Dumalag, Capiz.
Sa interview sang Bombo Radyo kay Police Corporal Khristoffer James Badilla, imbestigador sang Dumalag PNP nga nagapadayon pa ang ila imbestigasyon bangud wala sang anuman nga ID ang biktima nga basehan sang mga pulis.
Ginpahayag ni Padilla nga nasapwan na lamang sang pila ka mga residente ang wala matumod nga biktima nga wala na sang kabuhi, nagakulob kag nakagapos na ang mga kamot sini sang pisi kag gintabunan sang jacket ang iya ulo.
Base sa ila pagpangusisa sa mga residente nga malapit sa lugar nga nakabati sila sang apat ka asud-asud nga lupok sang armas luthang takna ala 1 sang kaaganhon apang wala man ini nagguwa sa ila nga balay.
Apang, may nakita sila nga kotse nga nagaduag sang itom nga hinali na lamang nga nagpaburhot padalagan matapos ang nagluntad nga krimen.
Indi pa matumod ang identity sang biktima apang may yara sang nakita nga tattoo ang mga pulis sa nawala nga porsyon sang kamot sang biktima nga may yara sang nabutang nga “Raymond Aguirre”.
Apang, indi pa masiguro kun amo ini ang pangalan sang ginpatay nga biktima.
Dugang pa sini nga pangayaw lamang ang biktima bangud indi ini residente sang amo nga barangay.
Nag-angkon naman sang pilas sa ulo kag kalawasan ang biktima tuga sang pagpangluthang.
Narekober naman sa lugar ang duha ka bala sang duha ka mga sahi sang calibre armas luthang.
Sa karon, nagapadayon pa ang imbestigasyon sang gintingub nga puwersa sang mga katapo sang Dumalag kag Dumarao PNP sa duha ka nagluntad nga krimen.
