ROXAS CITY – Nakilala na ang lalaki nga nasapwan nga patay sa nabukid nga porsyon sang Barangay Bolo, Roxas City sang damlag lang.
Ini ang ginkompirmar mismo sang hepe sang Roxas City Police Station nga si Police Lieutenant Colonel Ricardo Jomuad Jr. sang mainterview sang Bombo Radyo.
Suno kay Jomuad nga ang nasapwan nga patay ang ginkilala nga si Ronald Tangi, 39 anyos, tumandok sang San Antonio, Parañaque kag nag-estar sa New Road, Barangay Banica, Roxas City.
Ginpahayag ni Jomuad nga nagpadulong sa estasyon sang pulisya si Lourdes Lara kag isa ka menor-de-edad nga nagpakilala mga himata sang biktima.
Sa inisyal nga imbestigasyon, ginapahayag nga antes nadula ang biktima, nagkasu-ay sila sang iya manak nga menor-de-edad tubtob sa ini ang nasapwan na lamang nga wala na sang kabuhi.
Ginapahayag nga yara sa luwas sang pungsod ang iloy sang menor-de-edad nga amo ang live-in partner sang biktima.
Matandaan nga nasapwan ang biktima nga wala sang pang-ibabaw nga panapot kag may mga bagras sa magkatuhay nga porsyon sang kalawasan.
Nagapadayon naman ang imbestigasyon sang mga kapulisan agud matumod ang gintunaan sang kamatayon sang biktima kag kun paano ini nakalab-ot sa lugar kun sa diin siya nasapwan.
