Isa ka pamatan-on nga lalaki sa England nagbutang sang iya kaugalingon sa isa ka billboard bangod luyag niya maeksperiensyahan ang pagtigayon sing nobya!
Ang 23-anyos nga si Ed Chapman gikan sa Leeds ang wala gid nagamadinalag-on sa pagpangita sang nobya. Gintilawan niya ang tanan nga kinaandan nga mga pamaagi sa pagpangita sang nobya pareho sang pagpakig-upod sa mga ilimnan, mga clab kag mga partido subong man ang paggamit sang mga dating app.
Sa pagtinguha nga makita ang iya “The one”, si Chapman nag-arkila sang isa ka daku nga billboard sa pag-anunsyo nga siya wala sang nobya kag handa na nga mag-upod. Ang billboard nahamtang sa m621 motorway, isa ka mayor nga dalan nga ginagamit sang mga motorista sa Leeds, West Yorkshire.
Ang billboard nagapakita sang laragway ni Chapman nga nagasuksok sang terno kag nagauyat sang mga bulak. Ang tinaga nga “Date Me” yara sa ibabaw sang billboard agud ipakita nga nagapangita siya sang date. Sa idalom sini amo ang impormasyon sa pagkontak ni Chapman, TakeMeOnADAte@mail.com.
Si Chapman naggasto sang daku nga kuwarta sa pag-arkila sang isa ka digital nga billboard apang wala niya ginhinulsulan ang tagsa ka sentimo nga iya gingasto bangud sa sulod sang pila ka oras sang pagsaka sang iya ad, madamo nga mga babayi ang nagsabat sa sini. Ang mga nagpakita sang interes sa pagpakig-date kay Chapman naga-edad halin 18 tubtob 48.
Bangud sang positibo nga sabat sang mga babayi sa iya billboard, si Chapman may daku nga paglaum nga sa katapusan makatigayon na siya sang nobya
