BALITANG ESPESYAL – Isa ka lalaki nga palahubog sa Brazil ang nagbag-o ang dalagan sang iya kabuhi pagkatapos nga nagdesisyon siya nga mag-entra sa isa ka 8km nga makalilipay nga pagdalagan nga gin-organisar sa iya lokalidad, samtang nagaantos gihapon sang hangover.
Suno kay Isaque dos Santos Pinho, wala niya ginalauman nga mag-viral ang iya istorya sang nagdesisyon ini nga magpasakop sa walo ka kilometro nga palumba sa ila banwa sa Garrafao do Norte, Brazil. Gin-ako sini nga nagdalagan siya agud lang madula ang iya kahulugbon.
Sa video, makita si Pinho nga nagasuksok lamang sang cargo shorts, t-shirt, kag sneakers, apang determinado ini nga tapuson ang iya pagdalagan pakadto sa finish line rason nga madamo nga netizens ang nagdayaw.
Bisan pa nga nagapanguna siya sa una nga pila ka minutos sang palumba, si Pinho yara gihapon sa likod sa katapusan. Apang bangud sang iya determinasyon, ginhatagan siya sang mga organisador sang komplementaryo nga medalya.
Madamo ang natandog sa istorya ni Pinho nga nagtulod sa iya nga magbakal sang running shoes kag iban pa nga gamit sa pagdalagan. Karon, nagdesisyon siya nga mag-untat sa pag-inom kag magkonsentrar sa paghanas para sa palaabuton nga mga marathon.
