ROXAS CITY – Gin-release na sa karsel sang Panay Municipal Police Station si alyas Nonoy, ang suspek sa ginaalegar pagpanghimulos sa isa ka barangay kagawad sa isa ka barangay sa banwa sang Panay, Capiz.
Ini ang ginkompirmar mismo ni Police Captain Marvin Balmes, hepe sang Panay PNP sang mainterview sang Bombo Radyo.
Suno kay Balmes nga ginmandu sang piskalya ang pag-release sa suspek matapos nga nahulog sa regular filling ang pagpasaka sang panumbungon nga Rape batuk diri.
Mahibaluan nga sadtong nakaligad nga adlaw sang Lunes, Marso 2, gintinguhaan sang pulisya nga mapasaka via inquest proceeding ang kaso batuk sa suspek sa Provincial Prosecutors Office matapos nga nakuha na ang resulta sang medical examination nga ginpatigayon sa biktima.
Apang nahulog ini sa regular filling bangud ginapahayg nga wala sang ‘personal knowledge’ ukon ihibalo sa natabo nga krimen ang mga kapulisan nga nag-aresto sa suspek natuhoy sa natabo kag ginsugiran lamang ang mga ini.
Matandaan nga ginpaaresto sang barangay kagawad nga si alyas Inday ang suspek nga si alyas Nonoy matapos ginaalegar nga ginsulod siya sang suspek sa ila balay kag ginhimuslan.
Sang napakig-angutan sang Bombo Radyo ang suspek, hugot sini nga ginpanindugan nga wala sang pagpanghimulos nga natabo bangud lunsay kagustuhan nila nga duha ni alyas Inday ang natabo.
