Mga ka-bombo, nagapati bala kamu nga sa sobra mo ka-kumpiyansa, dira ka man perme gakadakpan?
Ari pagid, paano kon bangud sa kapigaduhon nakapinsar ka nga mangawat, pero sa baylo nga makapalagyo, natulugan ka pa sa balay nga imo ginsulod?
Bangud, isa ka makatilingala kag makahalam-ot nga hitabo ang narekord sa CCTV matapos gin-alegar natulugan ang isa ka kawatan sa sulod sang balay nga iya ginsulod.
Suno sa report, matapos magsulod sa balay, wala gilayon nagkuha sang malahalon nga mga butang ang suspek. Sa baylo, ginpaandar niya ang aircon para magpabugnaw antes magpungko kag magrelax.
Apang, pagligad sang pila ka minuto, natulugan ang lalaki samtang yara sa sulod sang balay nga iya ginsudlan nga daw kaangay feel at home ini.
Bangud sa iya katulugon, wala nakapalagyo ang suspek sang nag-abot ang mga tag-iya sang balay kag mga otoridad.
Nadakpan ang lalaki, samtang nagin trending naman social media ang natabo bangud daw kaangay nga tuman ka kampante ang suspek sa sulod sang balay nga iya ginsulod.
Madamo naman ang nalingaw sa natabo, apang ginpahanumdom sang mga otoridad nga ang pagpangawat isa sa gihapon ka mabug-at nga krimen kag ang sin-o man nga mapamatud-an nga naglapas sa kasuguan ang pagasabton.
