Lalaki nga yara sa impluwensya sang makahulubog nga ilimnon nagtuga sang gamo sa guha sang binaylehan, nagbato sa kapulisan

Wala makaluwas ang isa ka lalaki nga ginpahayag naggamo sa guha sang binaylehan kag nagbato sa mga kapulisan sa Sitio Sulayon, Brgy. Agtatacay Sur, Sapian Capiz.

Ginkilala ang amo nga lalaki kay Jorge Arrosa, 27-anyos, negosyante kag residente sang Barangay Tumalalod, Mambusao, Capiz.

Sa impormasyon nga nakuha sang Bombo Radyo nagikan sa Sapian MPS, ginpahayag nga samtang yara ining si Jorge sa guha sang binaylehan, nagtuga ini sang alarma kag gamo sa nasambit nga lugar.

Ginbadlong pa sang mga kapulisan apang ini ang nagbato.

Gilayon man nila ini nga gindakop kag gindala sa Sapian Mps para sa nagakaigo nga disposisyon.