Patay ang isa ka lalaki matapos bumunggo ang ginasakyan sini nga motorsiklo sa steel barrier kag poste sa Barangay Tico, Panay, Capiz.
Ang biktima amo si alyas “Dan,” 45-anyos kag residente sang Barangay Linateran sa amo nga banwa.
Sa interview sang Bombo Radyo kay Police Captain Eric Deocampo, Officer-in-Charge sang Panay Municipal Police Station, iya ginpahayag nga padulong kuntani sa banwa sang Pontevedra ang biktima kag pag-abot sa lugar nadulaan ini sang kontrol manabela sang motorsiklo kag bumunggo sa steel barrier kag streetlight.
Bangud sa mabaskog nga impact, naigo ang ulo sang biktima kag nahulog sa talamnan, nga nagresulta sa mga pilas kag gasgas sa nagkalain-lain nga parte sang iya lawas nga amo ang gintunaan sang iya kamatayon.
Samtang, magakoordinar ang Panay Municipal Police Station sa nagakaigo nga ahensya agud mapabutangan sang warning signs ang lugar para malikawan ang masami nga aksidente.
