MANGOSO, Sigma, Capiz – Patay ang isa ka lalaki matapos ginbuno sang amay sa ila puluy-an sa Purok II Barangay Mangoso, Sigma, Capiz.
Ang biktima ginkilala kay alias Rey, 43-anyos, kag mangunguma, samtang ang suspek amo ang iya amay nga si alias Naldo, 77-anyos, kag lunsay residente sang nasambit nga lugar.
Sa interview sang Bombo Radyo kay Police Major Narciso V. Sables Jr., Officer in Charge sang Sigma Municipal Police Station, iya ginpahayag nga base sa inisyal nga imbestigasyon, nag-abot ang biktima sa ila puluy-an nga yara sa impluwensya sang makahulubog nga ilimnon kag tuyo sini nga magpangayo sang kwarta sa iya amay, nga nagapahuway apang wala niya ini nahatagan.
Suno kay Sables, ginsunod pa gid ini sang biktima ang suspek sa saguwa sang ila balay kag nagapadayon ang pagpangayo, bangud sa diskusyon, kainit sang ulo, kag pagkairita
nakahimo sang krimen si alias Naldo nga ginakabig naman nga isa ka apa kag bungol, nabuno niya sang makatatlo ka beses si alias Rey sa wala nga bahin sang iya ilok.
Pahayag pa niya, ang natabo nga insidente gilayon naman ginrespondihan sang kapulisan kag gindalidali pa kuntani nga dalon sa pampubliko nga hospital apang sa masubo nga balita gindeklarar ini nga Dead on Arrival sang attending physician.
Dugang pa sang natungdan, nagapabilin nga wala pa makita ang suspek nga amay sang biktima samtang ang gingamit sa pagpangbuno wala man nakita sa lugar bangud kay nadala ini sang suspek.
Sa karon ginahulat ang desisyon sang pamilya kun magapasaka sang kaso, ini may kaangtanan sa posible nga kaso nga iya pagaatubangon nga homicide.
