Patay ang isa ka lalaki matapos ginbuno sang iya nga bilas sa Barangay Mainit, Cuartero, Capiz.
Ang biktima amo si alyas Gerry samtang ang suspek naman amo si Zaldy lunsay residente sang nasambit nga lugar.
Sa interview sang Bombo Radyo kay Police Captain Jesse Lepaña, Officer in-Charge sang Cuartero Municipal Police Station, iya ginpahayag nga may gin-report sa ila nga opisina may kaaangtan sa nasapwan nga patay malapit sang fishpond nga yara sa likod sang puluy-an sang anay kagawad sang amo nga lugar.
Suno kay Lepaña, nga base sa inisyal nga imbestigasyon samtang yara sa duyan ang suspek hinali nga nag-abot ang biktima kag ginhanaan ini nga lampusan sang matig-a nga bagay.
Diri na kag naakig ang suspek kag nagkuha sang kutsilyo kag ginbuno ang biktima sang makaduha ka beses sa lawas nga amo ang rason sa kamatayon sang biktima.
Sa subong, ginahulat nalang sang mga kapulisan ang desisyon sang pamilya sang biktima kun bala magapasaka sang kaso.
