ROXAS CITY – Patay ang 35-anyos nga lalaki matapos nga ginlabo sa magkatuhay nga bahin sang lawas sang nakaupod sini sa ilimnan sa Barangay Duran, Dumalag, Capiz.
Ginkilala ang biktima nga si Uldarico Angelo Parle sang Sityo Tacas, Barangay Duran, Dumalag samtang ang suspek nga naglabo sa biktima gamit ang 24 pulgada nga kalabaon nga sanduko amo si Juntie Feguroa sang Sityo Mente, Barangay Duran.
Sa impormasyon nga nakuha sang Bombo Radyo nga magkaupod man nga nag-inum ang duha kag dungan man nga nagpauli.
Apang samtang nagapuli na ang duha ginaalegar nga nagbaisay sila kag hinali lamang nga gingabot sang suspek ang sanduko kag ginlabo ang biktima sang makapila ka beses.
Gindala pa sa Tapaz District hospital ang biktima, apang gindeklara nga dead on arrival sang doktor.
Samtang natigayon man nga madakpan ang suspek sa hot pursuit operation kag karon nakahunong na sa karsel sang Dumalag PNP.
