Patay ang isa ka lalaki matapos ginluthang sa Barangay Gibato, Dumarao, Capiz.
Ang biktima amo si alyas “Roosevelt,” 37-anyos kag residente sang nasambit nga barangay.
Samtang ginatudlo naman nga suspek amo si alyas “Albert,” 31-anyos, residente sang San Rafael, Iloilo.
Sandig sa impormasyon nga nakuha sang Bombo Radyo sa Dumarao Municipal Police Station, nagainom ang suspek kaupod ang utod sang biktima sang mabatian nila nga nagasinggit sa dalan ang biktima.
Ginpalapitan ini sang suspek agud sawayon kuntani, apang nagluntad ang pagbinaisay sa tunga sang duha.
Nagpatunga ang utod sang biktima sa ila pagbinaisay kag nagpauli ang suspek.
Apang nagbalik ang suspek nga may dala nga 12-gauge homemade pistolized shotgun kag ginluthang ang biktima sa likod antes nagpalagyo.
Gindala pa ang biktima sa ospital, apang gindeklarar nga dead on arrival.
Naggsungka naman ang suspek sa San Rafael Municipal Police Station dala ang armas nga gingamit sa krimen kag yara na ini sa kustodiya sang Dumarao Municipal Police Station samtang ginapadayon ang nagakaigo nga legal nga proseso.
