ROXAS CITY – Patay ang 48-anyos nga lalaki matapos nga gintiro patay sang kaupod sa ilimnan sa isa ka birthday party sa Barangay Agambulong, Jamindan, Capiz.
Nag-angkon sang anum ka igo sa dughan ang biktima nga si Berlito Zulieta sang nasambit nga lugar matapos luthangon sang suspek nga si Donny Pavillon 40-anyos.
Ginpahayag ni Police Master Sergeant Mac Cornick de la Cruz, imbestigador sang Jamindan Municipal Police Station magkaupod nga naga-inum ang duha sa joint birthday celebration sang ugangan kag asawa sang suspek.
Bangud yara na sa impluwensiya sang makahulubog nga ilimnon ang biktima, masami ini nagabuhi sang indi maayo nga tinaga, rason nga ginsaway na siya sang suspek.
Apang sa baylo magsunod, mas nagdugang pa ang pagkalangas sang biktima nga gintunaan sang pagtiro sang suspek.
Gilayon nga gindala sa ospital ang biktima, apang gindeklara ini nga dead on arrival.
Boluntaryo naman nga nagsungka sa mga kapulisan ang suspek nga karon nakahunong na sa karsel sang Jamindan PNP.
Samtang wala nakita sang nagresponde nga mga pulis ang .45 caliber pistol nga gingamit ni Pavillon sa pagtiro-patay kay Zulieta.
