Patay ang isa ka 40-anyos nga lalaki matapos gin-luthang sa Sitio Balagtason, Barangay San Nicolas, Tapaz, Capiz sang aga sang Hunyo 14, 2026.
Ginkilala ang biktima sa alyas nga “Rog,” kag ang ginakilala nga suspek amo si alyas dan, 28 anyos nga residente sang amo man nga barangay.
Base sa inisyal nga imbestigasyon sang Tapaz Municipal Plice Station, nag-abot ang biktima sakay sang motorsiklo halin sa mini market kag ginapatihan nga naka-inom sang makahulubog nga ilimnon antes natabo ang insidente.
Suno sa imbestigasyon, pag-abot sang biktima sa guwa sang balay sang suspek, nagsinggit ini sang mga malain nga tinaga kag nagapagita sang away.
Bangud sini, naguwa suno sa report ang suspek nga may dala nga kalibre .45 nga armas kag gintiro ang biktima sang makapila ka beses nga na-igo sa nagkalain-lain nga bahin sang iya lawas.
Gilayon nga gindala sang mga personnel sang Bureau of Fire Protection ukon BFP ang biktima sa Tapaz District Hospital para sa bulig medikal, apang gindeklarar ini nga dead on arrival sang attending physician.
Matapos ang insidente, nagpalagyo ang suspek pakadto sa wala pa matumod nga direksyon.
Nagresponde naman dayon ang mga kapulisan sang Tapaz Municipal Police Station kag nagpadayon sang follow-up investigation kag hot pursuit operation agud madakpan ang suspek.
