CUARTERO, CAPIZ- Patay ang isa ka lalaki matapos nga nabungguan sang pick-up ang ginameneho sini nga dropside truck sa Barangay Bitoon Ilaya, Cuatero, Capiz.
Ang biktima amo si alyas ‘Cel’, 58-anyos, driver sang dropside truck, sakay ang asawa sini nga si alyas ‘Ime’, 46-anyos nga lunsay mga residente sang Barangay Bungsuan, Dumarao, Capiz. Samtang, ang driver naman sang pick-up amo si alyas ‘Gen’, 46-anyos akg residente sang Barangay Calapawan, panay, Capiz.
Sa interview sang Bombo Radyo nagikan kay Police Captain Alladen Talaban, Hepe sang Cuartero Municipal Police Station, ginpahayag nga samtang ginasubay ni alyas ‘Cel’ kag sang asawa sini ang dalanon halin sa Pontevedra, padulong kuntani sa Dumarao, hinali nalang ini nga nabungguan sang pick-up nga ginamaneho ni alyas ‘Gen’ nga nagikan naman sa Pototan, Iloilo kag padulong kuntani sa Panay, Capiz.
Bangud sa makusog nga impact, nag-angkon sang pilas sa magkatuhay nga parte sang lawas ang mag-asawa nga gilayon nga ginpadangat sa Senator Gerardo M. Roxas District Hospital Dao, Capiz sang mga katapo sang Cuartero Emergency Response Unit apang gindeklarar nga dead on arrival sang doktor nga nag-atendir si alyas ‘Cel’.
Samtang, nag-angkon man sang pilas ang driver sang pick-up nga si alyas ‘Gen’ nga ginpadangat man sa Mambusao District Hospital sang Cuartero Emergency Response Unit.
Sa karon, yara na sa isa ka punerarya sang amo nga banwa ang bangkay sang biktima kag yara naman sa kustodiya sang Cuartero Municipal Police Station ang mga nagkalaulamid nga mga behikulo samtang ginahulat pa ang magkatuhay nga bahin nga makig-hinun-anon para sa nagakaigo nga diposisyon.
