ROXAS CITY – Dead on Arrival ang isa ka 26 anyos nga empleyado sang Panitan Municipal Office matapos nga aksidente bumunggo ang ginamaneho nga motorsiklo sa isa ka elf truck sa dalanon sang Barangay Enseñagan, Panitan, Capiz.
Ginkilala ang driver nga si Jessie Dayalo sang nasambit nga lugar.
Sandig sa inisyal nga imbestigasyon ni Police Staff Sergeant Kenneth Anisco, imbestigador sang Panitan PNP, samtang ginasubay ni Dayalo ang dalanon gikan sa Barangay Bailan banwa sang Pontevedra padulong kuntani sa Barangay Enseñagan sang hinali na lamang ini nga nag-overtake sa isa ka motorsiklo nga nauna sa iya rason nga aksidente ini bumunggo sa kasugata nga elf truck nga ginamaneho naman ni Prudencio Dadivas Jr., 49 anyos sang Barangay Tico, Panay, Capiz.
Bangud diri, nag-angkon sang madamo nga pilas sa lawas si Dayalo kun sa diin nabali gid sini ang nawala nga tiil.
Gintinguhaan pa nga madala sa Bailan District Hospital ang biktima apang gindeklarar naman ini nga dead on arrival sang attending physician.
Samtang, ang driver naman sang elf truck nga si Dadivas ang temporaryo anay nga ginhunong sa karsel sang Panitan Municipal Police Station subongman ang elf truck kag motorsiklo para sa nagakaigo nga disposisyon.
