ROXAS CITY – Patay ang 49-anyos nga lalaki matapos ginluthang sang pakaisa sa Sitio Malanao, Barangay San Jose, Jamindan, Capiz.
Nag-angkon sang pilas sa likod ang biktima nga si Roberto Llauderes nga gintunaan sang iya kamatayon.
Ginpahayag ni Leonard Pajes kaupod nga naga-inum sang biktima nga masadya sila nga naga-inum inum sang hinali nag-abot ang suspek nga si Jordiolin Idio.
Isa sa mga nagainum ang nagpapuli sa suspek nga gilayon naman nga nagsunod.
Apang ginkakibot na lamang sang tanan nga sa pagbalik sang suspek may dala na ini nga isa ka 12 gauge shotgun.
Natabuan nga sa pagbalik ni Idio nakita sini ang nagapangihi nga biktima.
Posible nga nagdumdum ang suspek nga si Llauderes ang nagpapuli sa iya rason nga hinali niya ini nga ginluthang sa likod.
Gilayon nga gindala sa ospital ang biktima apang gindeklara ini nga dead on arrival.
Samtang nagsungka naman sa punong barangay sang Barangay Camburanan, Tapaz ang suspek nga nagturn over sa iya sa istasyon sang pulisya.
Suno naman kay Police Staff Sergeant Elvis Villasis nga nagaguwa sa ila inisyal nga imbestigasyon nga hinubog nga estorya ang motibo sa krimen.//
