ROXAS CITY – Pilason ang isa ka lalaki matapos mabungguan sang tricycle sa Roxas Avenue, Roxas City kaina pasado alas 4:00 sang aga Pebrero 12, 2025.
Ginkilala ang biktima kay alyas Junjun nga residente sang syudad sang Roxas samtang ang ginatudlo nga driver suspect nga nagamaneho sang tricycle ang ginkilala kay alyas Roger nga residente sang banwa sang Panay.
Sandig sa impormasyon nga nakuha sang Bombo Radyo sa lugar, ginpahayag samtang ginamaneho sang biktima ang iya motorsiklo kag magaliko kuntani sa karsada padulong sa TATC sang aksidente nga nabungguan sang tricycle nga ginamaneho sang suspek.
Ginaalegar nga yara sa impluwensya sang makahulubog nga ilimnon ang driver sang tricycle rason nga nadulaan ini sang kontrol sa iya pagmaneho.
Bangud sa aksidente, nag-angkon sang pilas sa magkatuhay nga parte sang lawas ang biktima kag gilayon nga ginpadangat sa malapit nga Hospital.
Sa karon, yara sa kustodiya sang Roxas City PNP ang behikulo para sa nagakaigo nga disposisyon samtang nag-settle naman ang magtimbang nga bahin angut sa nasambit nga insidente.
