-- ADVERTISEMENT --
PRESIDENT ROXAS, CAPIZ- Pilason ang isa ka lalaki matapos nga bumunggo ang ginamaneho nga motorsiklo sa center Island sang Aranguel Bridge, President Roxas, Capiz.
Ang nasambit nga lalaki amo si alyas “Argie”, 25-anyos kag residente sang Barangay Cubay sa amo nga banwa.
Sa impormasyon nga nakuha sang Bombo Radyo, nagikan sa President Roxas Municipal Police Station, ginapahayag nga samtang ginasubay sang amo nga lalaki ang dalanon nagikan sa Barangay Cubay kag padulong kuntani sa Public Plaza sang amo nga banwa gamit ang iya nga motorsiklo, hinali nalang ini nga nadulaan sang kontrol kabangdanan sang pagkabunggo sini sa amo nga center island.
Bangud sa makusog nga pagkabunggo, nag-angkon sang pilas sa magkatuhay nga parte sang lawas si alyas “Argie” nga gilayon naman ginpadapatan sang pauna nga pagbulong sang mga katapo sang President Roxas Municipal Disaster Risk Reduction and Management Council antes nga ginpadangat sa Bailan District Hospital, Pontevedra, Capiz para sa dugang nga mga pagbulong.
Sa karon, nagapabilin sa nasambit nga ospital si alyas “Argie” samtang yara na sa kustodiya sang President Roxas Municipal Police Station ang motorsiklo sini para sa nagakaigo nga disposisyon.
With a report from Bombo Jessa Mae De Los Santos
