ROXAS CITY – Nagpabalhag sa Roxas Component City Police Station (RCCPS) ang isa ka lalaki matapos ginaalegar ginlampusan sang tagad sa ulo kag ginpahog nga pagapatyon sa Sitio Sto. Niño, Arnaldo Boulevard Barangay Baybay Roxas City.
Ginkilala ang biktima kay Hestelito Durana, 42-anyos samtang ang suspek ang ginkilala kay Arnold Aragon, sa legal nga pang-edaron kag lunsay mga residente sang nasambit nga lugar.
Sandig sa ginpabalhag sang biktima, takna 5:30 sang hapon, kahapon nga adlaw, Hulyo 28 sang may nagluntad nga indi pag-intindihanay sa tunga nila ni Aragon, kun sa diin ginpahog sya sang suspek nga pagapatyon kag hinali nalang nga ginlampusan sa ulo gamit ang tagad.
Naaresto naman ang suspetsado kag nakahunong na ini karon sa karsel sang Roxas City PNP, samtang padayon naman nga ginabulong sa isa ka ospital sa syudad sang Roxas ang biktima.
