MAAYON CAPIZ – Pilason ang isa ka lalaki matapos ginapahayag ginlabo sa Sitio Minoro, Barangay Alayunan, Maayon Capiz.
Ginkilala ang biktima kay alyas “Dene”, 51 anyos, samtang ang ginapahayag suspek ang ginkilala kay alyas “Tonio”, 52-anyos, lunsay mga residente sang nasambit nga lugar.
Sa interview sang Bombo Radyo sa hepe sang Maayon Municipal Police Station nga si PMaj. Syril Punzalan, ginpahayag sini nga sang natabo ang insidente may nagluntad nga indi pag-intindihanay sa tunga sang biktima kag sang suspek matapos ginapahayag aksidente nga nagabot sang biktima ang linya sang kuryente sang suspek.
Suno kay Punzalan, nagpangayo man suno diri sang pasaylo ang biktima apang wala ini ginpamatian sang suspek kag hinali lamang nga ginlabo ang sang suspek ang biktima.
Mahibaluan nga nag-angkon sang apat ka mga pilas sa magkatuhay nga parte sang lawas ang biktima tuga sang pagpanglabo nga gilayon naman ginpadangat sa pinakamalapit nga ospital para sa nagakaigo nga disposisyon.
Sa karun, ginhilway na sa karsel sang Maayon MPS ang suspek matapos magtakop ang reglementary period sini.
Samtang, yara naman sa istable nga kondisyon ang nasambit nga biktima matapos ang insidente.
