Pilason ang isa ka lalaki matapos ginbuno sa isa ka bar sa Barangay Binuntucan, Pontevedra, Capiz.
Ang biktima amo si alyas “Leo”, 21 anyos, samtang ang mga suspek amo sanday alyas “Rap”, 35 anyos, alyas Sam 31 anyos, kag alyas “Moy, 34 anyos nga lunsay residente sang nasambit nga banwa.
Sa interview sang Bombo Radyo kay Police Captain Dennis Losbañes, Officer in charge sang Pontevedra Municipal Police Station, iya ginpahayag nga base sa ila imbestigasyon,yara sa impluwensya sang makahulubog ang biktima kag mga suspek nga nagresulta sang mainit nga pagbinaisay.
Suno kay Losbañes, madasig nga naghugot sang kutsilyo si alyas “Rap” kag ginbuno ang biktima nga nag-angkon sang pilas sa wala sini nga dughan.
Pahayag pa niya, madasig nga ginpadangat sa Bailan District Hospital ang biktima para sa dapatan sang nagakaigo nga pagbulong.
Sa subong, yara na ang mga suspek sa paghinakop sang Pontevedra Municipal Police Station para sa nagakaigo nga disposisyon.
