Pilason ang isa ka mamumugon matapos ginlabo sang isa ka lalaki sa Sitio Upper Quarry, Barangay Balatucan, Panitan, Capiz.
Sa impormasyon nga nakuha nagikan sa Panitan Municipal Police Station ginkilala ang biktima kay alyas Jr, 47-anyos, samtang ang ginatudlo suspek ginkilala kay alyas Lindie, 42-anyos nga lunsay mga residente sang nasambit nga lugar.
Ginapahayag nga samtang papuli na kun tani ang biktima sa ila balay ginbantayan ini sang suspek agud komprontahan sa madugay na nga ginpa-ubra sini nga sanduko sa biktima kun sa diin may nagluntad nga mainit nga pagbina-isay sa tunga sang biktima kag suspek kag hinali nalang ginlabo sang suspek ang biktima.
Bangud sini, pilas sa ulo kag tudlo ang naangkon sang biktima samtang pilas naman sa dalunggan ang naangkon sang suspek matapos ginkagat sang biktima.
Gilayon naman nga ginrespondehan sang Panit-an PNP ang ginluntaran sang insidente kag madasig man ginpadangat sa ospital ang nasambit nga biktima para sa nagakaigo nga pagbulong.
Nahibaluan nga yara sa idalom sang impluwenysa sang makahulubog nga ilimnon ang suspek sang matabo ang insidente.
Samtang, narekober naman ang hinganiban nga gingamit sang pagpanglabo sa ginluntaran sang insidente.
Sa karon yara na ang suspetsado sa kustodiya sang Panit-an MPS para sa nagakaigo nga disposisyon.
