PANITAN, CAPIZ – Pilason ang hinablos matapos ginlabo sang iya kaugalingon nga tiyo sa Sitio Banta-aw, Barangay Cogon, Panitan, Capiz.
Sa impormasyon nga nakuha sang Bombo Radyo nagikan sa Panitan Municipal Police Station, ginkilala ang biktima kay alyas Jose, 33-anyos, samtang ang suspek nga tiyo ang ginkilala kay alyas Elmer, 68-anyos nga lunsay mga residente sang nasambit nga lugar.
Ginapahayag nga samtang papuli na kun tani sa ila balay ang biktima sang gintambangan ini sang iya tiyo kag ginpasibangdan nga nagpang-utod sang tanom sini nga saging.
Bangud sini, may nagluntad nga mainit nga pagbina-isay sa tunga sang biktima kag suspek rason nga hinali nalang ginlabo sang suspek ang biktima gamit ang isa ka garab.
Pilas sa tiyan ang naangkon sang hinablos samtang napilasan man sa kamot ang tiyo kag lunsay ang mga ini ginpadangat sa magkatuhay nga ospital.
Nahibaluan nga yara sa idalom sang impluwenysa sang makahulubog nga ilimnon ang tiyo sang matabo ang insidente.
Sa karon, nagapadayon pa ang imbestigasyon sang kapulisan angut sa nasambit nga insidente.
