DUMARAO, CAPIZ – Pilason ang isa ka 57-anyos nga persona matapos nga ginaalegar ginlabo sang iya nga abyan nga gindul-ungan pa sini sang sud-an sa Barangay Dacuton, Dumarao, Capiz.
Ginkilala ang biktima nga si Marcelo Carba sang nasambit nga lugar.
Suno kay Police Staff Sergeant Raffy Arcenas, imbestigador sang Dumarao PNP nga nagkadto ang biktima sa balay sang suspek nga si Fernando Paclibar para magdul-ong sang sud-an kun sa diin ang suspek nagainit sang tubig para sa pagpangape nila nga duha.
Nahibaluan nga samtang nagahulat ang biktima nagpanaog ini sa balay ni Paclibar sang hinali na lamang ini nga ginlabo sang nasambit nga suspek gamit ang binangon sa wala matumod nga rason.
Bangud diri, nag-angkon sang madamo nga pilas sa ulo kag abaga ang biktima nga gilayon naman gindala sa ospital agud dapatan sang nagakaigo nga pagbulong.
Samtang, nakahunong na karon sa karsel sang Dumarao Municipal Police Station ang suspek matapos nga boluntaryo ini nagsungka sa mga pulis matapos ang insidente.
