Pilason ang isa ka lalaki matapos mabungguan sang motorsiklo sa Barangay Cagay, Roxas City.
Ang biktima amo si alyas Boyet, 52 anyos kag residente sang nasambit nga lugar.
Samtang ang nagamaneho sang motorsiklo amo ang isa ka 17-anyos nga menor de edad.
Sa interview sang Bombo Radyo kay kagawad Isidro Aragon, iya ginpahayag nga nagatabok ang biktima sang wala sini makita ang nagapadulong nga motorsiklo nga halin sa banwa sang Ivisan pakadto kuntani sa Roxas City.
Nag-angkon sang pilas sa lawas ang biktima bangud sang insidente.
Suno pa kay Kagawad Aragon, isa sa ginatan-aw nga rason sang aksidente amo ang makitid nga dalan kag mga salakyan nga naga-park sa kilid sang Cagay Highway.
Nagapahanumdom man ini sa publiko nga magsunod sa proper parking kag indi mag-park sa mga lugar nga mahimo magtuga sang trapiko ukon peligro sa dalanon.
