Pilason ang isa ka lalaki matapos magbungguanay ang iya ginamaneho nga motorsiklo kag isa ka tricycle sa National Highway nga sakop sang Barangay Natividad, Pilar, Capiz .
Ang driver sang motorsiklo amo si alyas “Jade,” 27-anyos kag residente sang Barangay Natividad, Pilar.
Samtang, ang driver sang motorized tricycle amo si alyas “Emy,” 54-anyos, residente sang Barangay San Esteban, Pilar.
Sandig sa impormasyon nga nakuha sang Bombo Radyo sa Pilar Municipal Police Station, padulong na kuntani sa ila puluy-an ang biktima sang nag-U-turn ang tricycle sa highway nga wala sang nagakaigo nga pag-amping ukon precaution, rason nga nagbungguanay ang duha ka salakyan.
Bangud sang mabaskog nga impact, nag-angkon sang pilassa ulo kag iban pa nga parte sang lawas ang driver sang motorsiklo.
Gilayon naman nga gindala ang mga biktima sa malapit nga ospital para mahatagan sang medikal nga atensyon.
(PILAR MPS)
Sa subong, yara na sa kustodiya sang Pilar MPS ang duha ka behikulo nga nalakip sa aksidente samtang nagapadayon ang imbestigasyon para matumod ang bug-os nga kahimtangan sang insidente kag para sa nagakaigo nga disposisyon.
