ROXAS CITY – Padayon nga ginabulong sa ospital ang 69-anyos nga lalaki matapos natumba ang ginamaneho nga motorsiklo sa Arnaldo Boulevard, Roxas City subong nga aga, Agosto 30.
Ginkilala ang biktima kay Dennis Machado residente sang Brgy. Malipayon sini nga syudad.
Sa pagpangusisa sang Bombo Radyo sa lugar, samtang ginasubay sang biktima ang dalanon nagikan sa ila puluy-an, pag-abot sa ginluntaran sang insidente ginapahayag wala natalupangdan ni Machado ang gina-construct nga dalan rason sang iya pagkatumba.
Bangud sini nag-angkon sang pilas sa magkatuhay nga parte sang lawas ang biktima, nga madasig naman ginrespondehan kag gindapatan sang pauna nga pagbulong sang Roxas City Emergency Response Team (RCERT) antes ginpadangat sa ospital.
Nagapadayon naman ang imbestigasyon angut sa insidente.
Lalaki pilason matapos matumba ang ginamaneho nga motorsiklo sa may bahin sang Arnaldo Blvd, Roxas City
-- ADVERTISEMENT --
